Atur Panampi Pasrah Penganten

          Assalamu’alaikum Wr. Wb.

Nuwun, para sesepuh, para tamu kakung putri ingkang kula kurmati.

Saderengipun kula nyuwun sih pangapunten ingkang agung awit kula jumeneng ing mriki.

Ibu Herlina Mega Puspitasari kula minangka wakilipun Bapak Rudianto sekaliyan ingkang wekdal punika mboten kuwawi matur, amargi Bapak Rudianto sekaliyan nembe ngeraosaken bombongin penggalih suka pari suka pikantuk sung-sung talining katresnan ingkang tanpa pepindhan.

Sepindah, Bapak Rudianto sarimbit ngaturaken puja-puji syukur dhateng ngarsanipun Gusti Allah SWT ingkang sampun ndhawahaken kanugrahan dhumateng Bapak saha Ibu Hermawan, katitik ing wekdal punika saged ngajangi pawiwahan upacara pasrah-pasrahan.

Ingkang kaping kalih, kula pribadi tuwin Bapak Rudianto sekaliyan ngaturaken pambagya rahayu wilujeng rawuh panjenengan sadaya, ingkang sampun kanthi sugeng basuki mlarapaken sarat sarana pasrahan saking dalem dumugining wisma mriki.

Kaping tiga, salam taklimpipun Bapak Hermawan lumantar panjenengan, kula tampi kanthi suka rena, gumbira ing manah. Mugi pangajab lan pandonga kala wau kajibahan dening Allah SWT, ambabar kanugrahan, kawilujengan dhumateng kula sawarga, sumrambah ing para tamu sedaya. Boten langkung dhawah sami-sami.

Semanten ugi, lumaraping sekar cepaka mulya sasele, inggih pasrahipun putra calon temanten kakung katampi kanthi renaning penggalih. Suka bingahing manah saking Bapak Rudianto sarimbit, menawi kenging kawedhar ing akathah, saha kepareng rinumpaka ing ukara, kadi kajugrugan wukir sari kabelebeging samodra madu. Ing salajengipun, menawi sampun dumugi titi wanci tumapaking gati tumunten badhe kapanggihaken anut satataning adat widhiwidana ingkang sampun sinengker ing tlatah Jetis RT 1 RW 11 Sukoharjo, saha badhe kabiwadha sakadaripun dening Bapak Rudianto sakukuban.

Salajengipun, Bapak Rudianto sampun kepareng paring kapitadosan dhumateng kula babagan kalampahanipun dhauping penganten, namung sagaduking kuwawi kula. Ingkang punika, panjenengan sakanca kula suwun lenggah prayogi ing palenggahan ingkang sampun dipuncawisaken, semanten sawetawis ngiras pantes angresteni dhaupipun penganten.

Minangka puputing atur, menawi wonten kuciwaning boja krami, anggen kula hangacarani menggah ing rawuh panjenengan sami, mugi lumeberna sih jalanidhi pangaksami. Semanten ugi, minangka talanging basa, hambok bilih anggen kula matur wonten kiranging subasita ingkang singlar ing reh tata krama, kupat janure klapa menawi lepat nyuwun pangapura.

Aakhiru kalam, uushikum wanafsi bitaqwallaah.

Wassalamu’alaikum Wr. Wb.